Агротуризм енĕпе çĕршыври чи лайăх проектсене палăртнă. Пурĕ конкурса 223 ĕç тăратнă. 73 фермер проектчĕ гранта тивĕçнĕ. Вĕсен йышĕнче Чăваш Енрен те пур. Патăрьел районĕнчи Шăнкăртамри Чулпан Пазюкова «Тургай» кану бази уçасшăн. Ăна Раççейри чи лайăх туризм проекчĕ тесе палăртнă. Сумлă конкурсра çĕнтернĕ ентеше пирĕн пултарулăх ушкăнĕ те саламларĕ. ЧУЛПАН ПАЗЮКОВА: «Эпир Раççейри конкурсра çĕнтернĕшĕн питĕ савăнатпăр. Çуркунне ăна Шăнкăртамра пурнăçлама палăртатпăр. Эпир туристсене йышăнса зоопарк уçасшăн. Хурт-хăмăр ĕрчетес, выльăх-чĕрлĕх тытас ăсталăхпа палаштарасшăн. Проекта пурнăçлама 10 миллион тенкĕ параççĕ. Укçине хальлĕхе куçарман-ха». Чулпан Пазюкова агротуризм проекчĕсен конкурсне иккĕмĕш хут хутшăнать. Шел пулин те, иртнинче çĕнтерме май килмерĕ тет. Шăпах çак пулăм ăна проекта çĕнетсе тепĕр хутчен ăмăртура хăйне тĕрĕслеме хистенĕ те ĕнтĕ. Çавăн пекех Чăваш Енрен тăратнă тепĕр икĕ ĕç лайăххисен йышĕнче. Финала тухма Мансур Валеев тата Валерий Шумилов фермерсене темиçе бал çитеймен. «Ял пурнăçне лайăхлатассишĕн, çĕнĕ проектсем пурнăçлас туртăм пулни пире питĕ савăнтарать», – тенĕ Чăваш Республикин ял хуçалăх министрĕ Сергей Артамонов. «Эппин пирĕн республикăра Чăваш Ене чунтан юратакан, вăй-халне шеллемесĕр ырми-канми тăрăшакан çынсем пуррине пĕлтерет ку», – тенĕ вăл фермерсене ăнăçу сунса