Элĕк районĕнчи "Новый путь" кооперативра тĕштырă культурисене - 1133, çав шутра кĕрхисене 366 га акса çитĕнтернĕ. Уй-хир карапĕсене Вениамин Константинов, Александр Евдокимов, Юрий Иванов, Владимир Порфирьев тухăçлă ĕçлеттереççĕ. Пĕр уйра тырпул кашни гектартан 32 ц тухнă. Александрпа Николай Тимофеевсем, Николай Арсентьев улăма преслаççĕ. Пĕлтĕр комбайнсем патĕнчен тырра йĕтем çине турттарса районта мала тухнă Валерий Васильев водитель тюксене КамАЗпа ферма çывăхне леçет.

"Алмаз" хуçалăхра вырмана июлĕн 26-мĕшĕнче тухнă. Унăн тырпула пухмалли икĕ комбайн. Пĕрин штурвалне çамрăк комбайнер Николай Денисов тытса пырать. Аслă пĕлÿ илнĕскер ялхуçалăх техникин вăрттăнлăхĕсене лайăх пĕлет. Вырмара пĕрремĕш çул çеç мар. Хăватлă техникăна ĕçлеттерме ăна Виталий Федотов механизатор пулăшать. Теприн кабининче - Михаил Коротков. Дон-1500 комбайна тухăçлă ĕçлеттерет.

Александр Ефимов водитель тырра КамАЗпа комбайнсем патĕнчен йĕтем çине çитерет. Владимирпа Сергей Викторовсем ăна çÿп-çапран тасатса типĕтеççĕ. Ĕçе икĕ сменăпа йĕркеленĕ.