Канаш районĕнче çуракине хатĕрленес ĕç кунсерен вăй илет. Аграрниксене çанталăк лайăх тăни хавхалану кÿрет. Ялхуçалăх пĕрлешĕвĕсем çак кунсенче çине тăрсах паха вăрлăх хатĕрлеççĕ, çунтармалли-сĕрмелли материал турттараççĕ. Чылайăшне укçа ыйтăвне татса пама кредит илни пулăшать.

Районта кăçал 24,2 пин га çинче ялхуçалăх культурисем туса илмелле, çав шутра 14 пин га çинче - тĕш тырăпа пăрçа йышшине. Çĕрулмине пĕлтĕрхинчен ытларах çитĕнтерес тĕллевпе лаптăкне 600 гектара çитересшĕн. Выльăх апачĕ те ытлă-çитлĕ пулĕ. Уйсем юртан тасалсанах агрегатсем нумай çул ÿсекен курăксене апатлантарма тухĕç. 4481 га йышăнакан лаптăкри кĕрхисене те çу каçипех тимлĕ пăхмалла, сăтăрçăсем тапăнасран сыхламалла.

Вăрлăх çителĕклĕ, 75% - кондициллĕ, çĕрулминне 66% çеç хатĕрленĕ /500 тонна/, ыттине туянмалла.

- Вăрлăха çĕнетессишĕн кăçал та çине тăрсах ĕçлетпĕр, - терĕ районăн тĕп агрономĕ Валерий Долгов. - Темиçе хуçалăх хăйсене кирлĕ чухлĕ элита туянчĕ. Акана тухма техника çитет, механизатор вара сахалрах. Мускавран таврăнакансен хушшинче сахал мар-ха вĕсем. Çавсене явăçтарасшăн.

Çуракине тĕплĕн хатĕрленессипе Киров ячĕллĕ ЯХПК ырă тĕслĕх кăтартать. Кунта ака-суха çулленех уява çаврăнать. Халăх уй-хиршĕн хĕл каçипе тунсăхланă хыççăн хавхаланса вăй хурать.

- Вăрлăха йăлтах пĕрремĕшпе иккĕмĕш класа лартрăмăр. Пурĕ 800 га çинче ака ĕçĕсем ирттермелле, кĕрхисем 200 га йышăнаççĕ. Сеялщиксем медкомисси витĕр тухнă. Хуçалăхра юлашки ĕçсем пыраççĕ. Механизаторсем енчен пирĕн те йывăртарах. Ыйтăва вырăнтах татса пама майсем шыратпăр. Пирĕн вĕсем универсал, кирлĕ чухне кирек хăш техникăпа та ĕçлеме хатĕр. Паян тракторист пулсан, ыранах - водитель, вырмара - комбайнер, - тет ЯХПК бригадирĕ Вячеслав Зефиров. - Икĕ агрегатпа акатпăр. Анатолий Орловпа Олег Артизанов - опытлă механизаторсем, ятлă-сумлă. Олег Раççей пĕлтерĕшлĕ награда илнĕ, Анатолий - тăван хуçалăхăн тава тивĕçлĕ ĕçченĕ.

В.ВАЛЕНТИНОВ.