"2008-2012 çулсенче ял хуçалăхне аталантарасси, продукци, чĕр таварпа апат-çимĕç рынокне йĕркелесе тăрасси” программăна ăнăçлă пурнăçлама журналистсем те хастар хутшăнаççĕ. Вулакан хыпарпа е сводкăпа паллашса хăй пурăнакан тăрăхра ял хуçалăх ĕçĕсем епле пынине куллен пĕлсе тăрать, çитĕнÿсемпе хавхаланать. Механизаторăн, ĕне сăвакан операторăн ÿсĕмлĕ ĕç вăрттăнлăхĕ те кăсăклантарать ăна. Çав çынпа вăл куллен тĕл пулсан та ун çинчен нимĕнех те пĕлмест иккен. Хаçат, ТВ е радио ăна пултаруллă çĕр ĕçченĕпе çывăхрах паллаштарать.

Массăллă информаци хатĕрĕсен пĕлтерĕшĕ калама çук пысăк. Чăваш наци музейĕн конференц-залĕнче “Раççей пресси - ял хуçалăхне аталантармалли патшалăх программине пурнăçлама пулăшакан вăй” темăпа тĕл пулу иртни ăнсăртран мар. ЧР Президенчĕ Николай Федоров, РФ Патшалăх Думин Аграри ыйтăвĕсемпе ĕçлекен комитечĕн председателĕ Валентин Денисов, Патшалăх Думин депутачĕ Павел Семенов, ЧР ял хуçалăх, культура министрĕсем Михаил Игнатьевпа Роза Лизакова ял хуçалăх темипе çыракан МИХ ĕçченĕсемпе тĕл пулчĕç.

Николай Федоров Президент Чăваш Енри Çĕр ĕçченĕн çулталăкĕ пирки аса илтерчĕ: ялта тăрăшакансем кăçал “5” паллăлăх вăй хураççĕ. Сакăр уйăхри кăтартусем аван. Выльăх-чĕрлĕх фермисемпе комплексĕсене тĕпрен юсама илекен çăмăллăх кредитсем çитес çулсенче продукци ытларах хатĕрлеме шанăç параççĕ. Агропромышленноç комплексĕнче çĕнĕ 78 проект тĕллевлĕ ĕçлени савăнтарать. Патшалăх программи старта тухнăранпа çулталăк çурă çеç иртнĕ. Апла пулин те кăтартусем курăмлă. Проектсене пурнăçлама патшалăх 551 млрд тенкĕ уйăрма палăртать. Кризиса пула бюджета 15 процент чакарас тĕллевлĕ, АПКра - 6 процент çеç.

Республика ертÿçи ялсенче пурăнакан кашни пиллĕкмĕш çемье кредитпа усă курнине ырăпа палăртрĕ. Патăрьел, Елчĕк, Шăмăршă ял тăрăхĕсем уйрăмах пуçаруллă. Вĕсене пулах ял хуçалăхĕ ăнăçлă аталанать, Чăваш Ен ят-сумĕ ÿсет.

“Çавра сĕтелре” калаçу патшалăх программине пурнăçлас ĕçе МИХсем епле çутатни çинчен те пычĕ. Хастар журналистсене хавхалантарма çĕршывра, республикăра пултарулăх ăмăртăвĕсем çулленех ирттереççĕ. Кăçал Чăваш Енре “Ылтăн пучах” конкурс йĕркеленĕ. Çĕнтерÿçĕсем валли сумлă преми уйăрнă. “Хăвăра çĕр ĕçченĕ вырăнĕнчех туйнăран сăмахăр чĕрĕ, витĕмлĕ”, - терĕ Николай Федоров. “Халăх сире пирĕнтен ытларах ĕненет, - калаçăва хутшăнчĕ Валентин Денисов. - Вулакансем сире шанаççĕ, хисеплеççĕ”.

Чăваш наци радион редакторĕ Лира Леонтьева, “Советская Чувашия” хаçат журналисчĕ Вячеслав Иванов хăйсен ĕçĕ, ял çыннин пурнăçри вырăнĕ çинчен сăмах хускатрĕç. Чылай çамрăка кану центрĕсем çукки, клубсем япăх ĕçлени пăшăрхантарать. Çамрăк специалистсем тăван тăрăхĕнче юласшăн мар, йывăрлăх кăшт пулсанах хулана туртăнаççĕ. Кружок е секци уçма, ăмăрту, тĕрлĕ мероприяти йĕркелеме вырăнти шкулсенче акт тата спорт залĕсемпе тухăçлăрах усă курма сĕнчĕ Президент.

ЧР культура министрĕ Роза Лизакова ял çамрăкĕсене канăç паман çивĕч ыйтусене хаçат-журналта çине-çинех хускатмалли çинчен аса илтерчĕ, ял хуçалăх темине тарăнрах çутатас тĕллевпе грантсем уйăрни çинчен каларĕ.

Первоисточник: "Хыпар"